L@mees

السلام عليكم ورحمة الله وبركاته
...........................
انا من سنة اولى في الكلية دي وانا بفكر في الاقسام والتخصصات وعملت بحث على كذا حاجة وجبت الخلاصة....
.........
ملحوظة:
منعا للاحباط...انا جبت اللي عن قسم علوم حاسب ونظم المعلومات وبس علشان هما دول القسمين اللي عندنا في الفيوم...بس اللي عايز يعرف اكتر وينبهر بالاقسام التانية...مفيش اي مشاكل اني احطهم....
...
اسيبكو بقى مع الاقسام:
======================
أ - قسم علوم الحاسب Computer Sciences Department = CS :
القسم ده من اجمل الاقسام اللي في كلية الحاسبات و المعلومات ...

و ده لأنك ح تاخد فيه معظم لغات البرمجة الموجودة في الكمبيوتر يعني مثلاً زي ( السي و السي بلس و السي بلس بلس و الجافا و الاسيمبلي و السي شارب ... الخ الخ ... ) ..
القسم ده الرياضه فيه مش كتير قد ما البرمجه فيه اكتر ..
المواد بتاعته بتختلف من جامعة لجامعة , لكن عموماً المواد باختصار بتعلمك ازاي تترجم لغات البرامج و ازاي تدرس البنية التحتية للبرمجيات , لانك ح تبقى مصمم برمجيات او مبرمج , و المبرمج بيهتم بالبنية التحتية للبرنامج ..
كذلك بتاخد مقتطفات عن برمجة الشبكات و مواقع الانترنت ...
لكن دراستك في هذا القسم بتنصب على برمجة الحاسب ...

التخصص في هذا القسم من سنة تالتة في بعض الجامعات زي حلوان ... و في من سنة رابعة زي عين شمس ... و في حاسبات بنها مفيش غير القسم ده و بس ...

طبعاً لقبك في مصر بيبقى مبرمج او مطور و رسمياً اسمك اخصائي حاسب , في بره مصر : مهندس برمجيات ...
المستقبل في هذا القسم مشرق جداً , و شغلك ح يكون في شركات الكمبيوتر اللي في مصر ..
و يا سلام لو طلعت من العشرة الاوائل في الكلية , شركات زي مايكروسوفت و اوراكل بتاخدك تشغلك ...
- - - - - - - - - - - - - - - - - - -

ب - قسم نظم المعلومات Information Systems Department = IS :
قسم نظم المعلومات من اجمل اقسام الكلية فعلاً ...
و للعلم لا خريج من نظم معلومات الا و بيشتغل في شركات كبيرة و بمرتبات رائعة ...
طبعاً نظم المعلومات بتدرس برمجة و بعض من شبكات الانترنت و الاتصالات و بعض من مواد التسويق و ادارة الاعمال ...
طبعاً البرمجة هنا باقصد برمجة قواعد البيانات SQL ...
الا انه برضه بياخد بعض لغات البرمجة مش كلها ..
بس دراسته تنصب على قواعد البيانات ...

المواد باختصار بتتكلم عن التجارة الالكترونية , و برمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي ... بالبلدي , ازاي تتعلم تصمم برامج لادارة الشركات و البنوك ... و ازاي تخزن بيانات الشركة كلها على برنامج واحد او على موقع انترنت واحد ...

لقبك جوه مصر : اخصائي نظم او مطور او مبرمج برضه , بره مصر : مهندس معلومات , او مهندس معلوماتية ...

المستقبل هنا لا تعليق , كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر , لان الشغل هنا بيبقى احسن كمان ...

بس خد بالك , لو ليك في برمجة قواعد البيانات فعلاً , يبقى عليك و على القسم ده ...
========
انا كمان حبيت اقول اني من غير م اعرف الفرق بين القسمين ...كنت حابة جدا نظم معلومات...واللي يلاحظ في ملف التعريف من زمان انا كاتبة التخصص نظم معلومات :)
.....
تحياتي