الجمعة، 20 فبراير 2009

اعتذار

0 التعليقات مرسلة بواسطة Lamees في 4:27 ص

سلام عليكم

دي رسالة اعتذار...

لكل اللي يعرفوني في الكلية...

بعتذر ليهم عن نيتي المسبقة في تغيير اسلوبي مع الجميع..

مش هيكون اسلوب وحش ... لأ ...هيكون اسلوب جد شوية...

الكل اتعود مني ع الهزار الكتير....

وانا كنت بحب كده

بس نتيجة لظروف صعبة مريت بيها واتأثرت بيها ولسه بتأثر فيا....لاحظت اني بقيت عصبية اكتر من الاول...

واكيد العصبية دي هتفضل معايا طول الترم ده انا شاء الله...

مش عايزة حد يتجنب التعامل معايا.... لأ، انا عايزاكو تلتمسولي العذر وما تزعلوش مني وسامحوني لو ما ضحكتش كتير ...

ان شاء الله بعد الفترة دي ارجع احسن من الاول(السنة الجاية ان شاء الله يعني... لو ربنا كتب لي عمر اعيشه....)

مرة تانية ...

مش عايزة حد يزعل مني ولا يكرهني...

سلام

 

الثلاثاء، 17 فبراير 2009

اتحدى نفسك...

7 التعليقات مرسلة بواسطة Lamees في 3:47 ص

بتمر بينا الايام...
وبتعدي السنين...
وبتفضل اوقات ضايعة كتير في حياتنا...
دقايق مرمية هنا وهناك ضاعت من بين ايدينا، ولو جمعناها هتعدي الساعات...
رغم اننا في احيان كتيرة مش بنقدر نعمل حاجات عشان فاكرين ان مش عندنا وقت...
بس مع شويةتخطيط و مهارات هنقدر نستغل الدقايق الغالية اللي في عمرنا وننجز كتير.

انت هتكون من اللي بيواجه ايامه بعقل لبيب.. وقلب معطاء .. وساعد بنّاء عشان يبني ويعمر ذاته ونفسه ودينه ووطنه؟!
ولا هتكون من اللي بينام ليله ويواصله بالنهار..
ويأجل اعماله ويراكم واجباته والتزاماته؟!
من هنا تبدأ تحدي نفسك..

اتمنى كل اللي يرد يكتب هيتحدى نفسه في ايه...
وعايز يبقى ايه...

 

تأمل دقيقة

0 التعليقات مرسلة بواسطة Lamees في 2:45 ص

سلام عليكم...
ده تفسير علمي لبعض آيات القرآن الكريم... واللي بتوضح الاعجاز العلمي فيه...
************
قال تعالى: " وجعلنا السماء سقفا محفوظا"
اثبتت الابحاث العلمية ان الغلاف الجوي يصفي شعاع الضوء الآتي من الفضاء المؤذي للكائنات الحية بحيث لا يسمح بالمرور الا للاشعاعات غير الضارة والاساسية للحياة.
-----------------
قال تعالى: "ومن يرد ان يضله يجعل صدره ضيقا حرجا كأنما يصّعد في السماء"
ان الارتفاع بالجو مسافات عالية يسبب ضيقا في التنفس وذلك لانخفاض نسبة الاوكسجين في طبقات الجو العليا حتى يصل الضيق الى اشد مراحله وهو مرحلة الحرج.
---------------
قال تعالى: " عاليهم ثياب سندس خضر واستبرق"
يرد لفظ الخضرة في آيات القرآن واصفا حال اهل الجنة وقد وصلالعلماء الىقرار قاطع بأن اللون الوحيد الذي يجلب السرور في النفس والانتعاش هو اللون الاخضر.
--------------
قال تعالى: "قال ربٍّ إني وهن العظم مني"
تأكد علميا ان العظام تعمل على انتاج كريات الدم الحمراء والبيضاء، هذا بالاضافة الى ان حالة العظام تؤثر مباشرة على الجهاز العصبي وانها تتدخل تدخلا مباشرا في قدرة الانسان على الانجاب.
--------------
قال تعالى: "والسماء بنيناها بأييد وإنا لموسعون"
قد ثبت علميا ان الفضاء كالبالون ينفخ فيتوسع شيئا فشيئا وهذه العملية من التوسع مستمرة دون توقف.
--------------
قال تعالى: "وهو الذي مرج البحرين هذا عذب فرات وهذا ملح أجاج وجعل بينهما برزخا وحجرا محجورا"
توصل اساتذة البحار بأن البرزخ الحاصل بين المياه المالحة والعذبة له خصائصه المميزة فإن له اسماك وحيوانات خاصة به ، وهنا يتجلى الاعجاز.
-------------
قال تعالى: " قد أفلح المؤمنون . الذين هم في صلاتهم خاشعون"
ثبت علميا ان استغراق الانسان في الصلاة بخشوع يزيد تدفق الدم في المخ في منطقة الفص الجبهي وهي مسؤولة عن التحكم بعواطف وانفعالات الانسان.
--------------
قال تعالى: " والصبح اذا تنفس"
ان انتاج الاوكسجين من خلال عملية البناء الضوئي تبدأمع بدء طلوع الشمس والبناء الضوئي هو تلك العملية التي تقوم بها النباتات بأخذ ثاني اكسيد الكربون من الهواء وطرح غاز الاوكسجين.
---------------
قال تعالى: " فإذا أنزلنا عليها الماء اهتزت وربت"
انا ماء المطر اذا سقط على التربة احدث لها اهتزازات فتتحرك وتسري فيها الحياة بعد ان كان كل ما فيها ساكن كالبكتيريا والفطريات..وقد ثبت ذلك علميا.
--------------

تقبلوا تحياتي.. وارجو ان الاستفادة تعم الكل

 

الاثنين، 16 فبراير 2009

كلام قبل نتيجة الامتحانات

0 التعليقات مرسلة بواسطة Lamees في 2:34 ص

السلام عليكم...

انا قلقانة جدا من نتيجة الفصل الاول ...القلق ده مش عادي
لأنه محاولة لتجاهل التقصير الكبير اللي صدر مني الترم الاول

انا مش قادرة اتوقع لنفسي اي تقدير بالمرة ، و عشان اكون واضحة انا مش مستبعده اني اشيل مادة ولا اتنين...مع اني بدعي ربنا ان يكون ده وهم

اصل انا عارفة انا عملت ايه في الامتحانات... وانا مش من الناس اللي تبقى حلت كويس في الامتحان وتطلع تقول عكيت الدنيا...
انا احيانا بخرف في الامتحانات بس ربنا بيسترها معايا وبلاقي نتايج غير اللي انا بتوقعها...
يمكن دي رسالة بتقولي لو عديتي مرة مش هتعدي اللي بعدها واعملي اللي عليكي ودوسي على نفسك شوية في المذاكرة....

بس والله انا لو هحكي على اللي حصلي الترم اللي فات هتعرفوا ان معظم المواقف كانت مش مني انا ، لأ من اللي حواليا سواء معيدين او طلبة

وهتكلم عن كل حاجة:

المعيدين..

هبدأ بمادة الـ data structure لأنها اكتر مادة اتظلمت فيها او حاسة اني اتظلمت فيها...
لما أسلم شيت بالايميل للباشمهندسة... وتقولي انه مش واضح... وابعته للمرة التانية... وفي الآخر ما اخدش درجته((10 درجات مش قليله خالص))
وهي تخلي مسؤوليتها ... يبقى اتظلمت ولا لأ؟

اما مادة الـ logic العظيمة اللي هي اكتر مادة حبيتها بجد... ربنا وعدني بمعيد لا بيطيقني ولا بستظرفه...بيبهدلني في امتحانات السكاشن((مع العلم اني عمري ما قيّمت نفسي على امتحان سكشن لأي مادة)) والكل عارف كده، ومعتبرني بنت فاشلة مكبرة دماغها
فبالتالي بيتعامل معايا على الاساس ده.

مادة الاحتمالات.. المعيد حصل بيني وبينه موقف مش ظريف كان على وشك انه يوصله لدكتور بدر الدين...
الموقف هو ان احنا اتأخرنا في السكشن ده عن معاد الطلوع...
في البيت قلقوا عليا وفضلوا يتصلو..
الاول خالتي اتصلت ..استأذنت منه ارد ع الموبايل.. وطلعت
بعديها كل الناس موبايلاتها رنت برضو.. طلعت بنت ترد ع الموبايل.. موبايلي رن تاني..المرة دي اختي
استأذنت منه تاني وانا محرجة.. قالي اتفضلي..طلعت وانا طالعة البنت التانية كانت داخلة.
.وحسب حكاية البنات كنا هنتخبط في بعض بس انا طبعا مخدتش بالي ..كل اللي هاممني اطلع ارد على الناس القلقانة
رديت ودخلت المدرج..
لقيتو بياخد الغياب...لما وصل عند اسمي قاللي حضرتك غياب السكشن ده...!!! ومشي...!!
طبعا انا مصدومة في كل ده ومش فاهمة ايه اللي حصل... البنات قالولي ماتسكتيش .. وانا عيطت وقلت يعني ايه افضل كل ده في الكلية وفي الاخر يقول غياب!!! والناس اللي قلقانين عليا كانو يستاهلوا القلق ده!!!
.... واحد يعرفني عرف الموضوع، والمعيد ده كان صاحبه..قاللي انا هكلمه...
لقيتو راجع يقوللي انه مكبرالموضوع وهيوصلو لدكتور بدر،وقالي روحيله وهدي الموضوع...
قلتله انا هروحله عشان اعرف الموضوع ايه اصلا؟!!!
ورحت للمعيد...
قابلني مقابله غريبة ..
عرفته اسمي وسألته انا ليه اتاخدت غياب وانا حاضرة السكشن؟
قالي اني ضحّكت البنات وانا طالعة لما كنت هخبط في البنت...قلتله انا ما اعرفش اني خبطت في حد وكمان قلتله ان انا مش مسؤولة لو البنات ضحكو...>>>ده هما اللي ضحكو مش انا..!!!
وقالي كمان طلعتي تردي ع الموبايل مرتين...
قلتله انا مستأذنة من حضرتك وبرضاك ، لو كنت رافض كنت هتقولي لأ ببساطة...و انا كنت طالعة اطمن ناس قلقانة مش طالعة العب... واعتذرتله ، وبالنسبالي خلص الموضوع>>> بس لسه بقول له ( بسيوني بسيوني)....
بس هو لسه بيدايق مني وبيتنشن معايا...هو اصلا مالهوش تعامل كتير مع البنات..
احسن :)
اما دكتور المادة اصلا ... كتر خيره نجحني في امتحان الميد تيرم ع الحافة زي ما بيتقال... يادوب درجة النجاح مع ان الامتحان بتاعي شافته صاحبتي اللي جابت 12 من 15 وقالتلي انه مظبوط ما عدا المسأله الأولى- اللي ما اعتقدش ان عليها نص الدرجة يعني-.


نيجي بقى للصدمة:
البنااااااااات... صحباتي... المفروض يعني يبقو كده:
انا اتفاجئت بورق داتا معاهم ليلة الامتحان وصورته وطبعا ما اتفتحش... ولاحد جاب سيرته منهم ولاقاللي عليه ولا اي حاجة خالص...

اتفاجئت برضه بواحده صحبتي بتتصل عليا وانا في البيت بتقولي ده فيه سكشن رياضة النهارده... انت مش جايه؟
قلتلها مين اللي قال؟ انا محدش قاللي...!!!
وراح عليا السكشن...
عاتبت البنات اللي ما بلغونيش ...
واتصدمت من الرد..
واحدة قالت: احنا قلنا انك مش هتحضريه ، عشان كده ما قلناش ليكي...هو انت كنت هتحضري؟
والتانية قالتلي ده ما قالش حاجة خالص ومشي...
يعني كان جاي يتفرج عليهم ومشي ولا ايه؟
طب مش المفروض الواحد يبلغ ويسيب القرار لصاحبه....
في حاجة في الدنيا اسمها قلنا مش هتحضري.. الناس هي اللي بتقرر اليومين دول اذا كنت هحضر ولالأ!!!!!!

بجد ... صدمة!!!!

واللي تطلع من امتحان تقول انا هسقط ...ولما تعرف درجتها تتعصب و تقول: ..ازاي ده انا حليته كله صح ده انا المفروض اقفل..!!!
يعني انا هستفيد ايه لما تقول كده.. هكبر دماغي واقول مافلانة عكت زيي؟
...وهي يعني بتحوش العين من عليها...خايفة من الحسد؟

.. انا الحمد لله لو الشيطان وسوسلي اني احسد حد بفتكرعلى طول الآيه:" ... ومن شر حاسد اذا حسد" وانا مستحيل اتخيل نفسي الشخص اللي الناس بتستعيذ ربنا منه....


غير حاجات تانية مالهاش لازمة تتقال...
كفاية كده
اكيد في مواقف بتتكرر مع ناس غيري ...
يبقى ده طبع في الناس!! ولا ايه بالظبط؟



 

الخميس، 12 فبراير 2009

الترم التاني ع الأبواب

2 التعليقات مرسلة بواسطة Lamees في 5:52 ص


العد التنازلي لبدء الدراسة للفصل الدراسي التاني ابتدا...

اخبار الاستعدادات ايه؟

اخبار النفساوية؟

ناويين تفضلوا على نفس الحال ، ولا ناويين على شد الحيل؟
ربنا يوفقنا جميعا ... ونلاقي نتيجة لـ تعبنا
دعواتكو ليا بقى... ;)
سلاموز.. :)

 

الأربعاء، 4 فبراير 2009

تهييس آخرالليل

2 التعليقات مرسلة بواسطة Lamees في 3:58 ص


كنت فاكرة نفسي جامدة
بسمع حكاوي الناس عنه
اقول تفاهة

قالولي جايلك يوم هتدوقي فيه طعمه..
برضه ماسدقتش
وعملت فيها ناصحة

قلتلهم اشغل بالي ليه
انا لسة مش مستعده
خلي دماغي بالدراسة شغالة

حواليا جيراني من كل اتجاه
اللي باعت اخته تظبطني
واللي امه جاية

ورحت الكلية
وشفت ناس كتيييير
قلت لسه شوية

سبت دماغي للمذاكرة
وسبت قلبي في البيت
عشان يهدى شوية

ما انا عارفة قلبي
لما يمسك في حاجة
يمسك فيها بإدين قوية

في يوم من الايام
صحبتي حكتلي على حكاية
مش اللي هيه

خير اللهم اجعله خير
قالتلي حاجااااااااااااات
خلت روحي مش فيا

رحتي فين يا روحي؟
قالتلي رحت اجيب قلبك
وعيشي حياتك شوية

من يومها قلبي معايا
بهدلني الله يسامحه
بقت حالتي مش طبيعية

بهييس كتيييييييييييير
واهزر كتيييييييير
مش حاجة جديده عليا

الجديد اني شايفاه معايا
في كل لحظة
و في كل ثانية

وبسأل نفسي
شايفني ولا لأ؟
ولا تقلان عليا؟


معقول!!
ده معايا على طول
بشوفه قدام عنيا

بحب اشوفه
وعيني تيجي في عينه
ولو شوية

بس لو غاب عليا
يالهوووووووي عليا
بدايق واعصب شوية

يا خوفي لأكون واثقة في واحد
يجرحني ويسيحلي
ويطلع بيرسم عليا

انا كان مالي بده كله
ما كنت واحدة جامدة
مش بتاعة الكلام ده

يا شماتة الناس فيا
يا فرحتهم فيا
وهما شايفينه في عنيا


هو ايه اللي شايفينه
طبعا مفيش غيره
قطع الـ .. وسنينه
............................

 

هندسة

0 التعليقات مرسلة بواسطة Lamees في 3:03 ص


فجأة افتكرت لحظات قضيتها في كلية هندسة الترم الاول... وحبيت اني احكيها:::
الكل عارف ان الاسبوع الاخير من الدراسة بيكون عامل ازاي والناس بتهييس فيه كتير وبتحتاس آخر حوسة
المهم ان الاسبوع الاخير كان معايا انا غير كل الناس... عشان قضيته في كليتين
كليتي طبعا وكلية هندسة مع اختي...
قسم عمارة عندهم اسبوع اسمه اسبوع التبييض ( تبييض الشاسيهات)
انا طبعا كنت بطلع من الكلية عندي اروح هندسة و ابدأ التبييض معاهم >> طبعا بعد ما علموني ازاي اشتغل معاهم
اعمل شوية في شاسيه مروة وشوية في شاسيه ريم وسارة ورنا وشوية عند عزت وايمن ومصطفى وشوية لتغريد وغيرهم >> تقريبا 10 شاسيهات
أحلى حاجة لما كنا نهيس مع بعض ونستعبط ونغني شوية ونتترق شوية>> كنا بنطلع مواهب صراحة
انا نفسي ما كنتش اتخيل اني هتعامل مع الناس دول كلهم لأني في الكلية عندنا صم بكم عمي... سيبك من ده كله ، مفيش وجه مقارنة اصلا.. :)
احيانا كنت بذاكر الdata structure وانا قاعده معاهم ... واحد سألني بتذاكري ايه؟
قلتله: بذاكر trees... بص في الكتاب شوية وقاللي وهو مستغرب: اللي هي شجر يعني؟
قلتله: ايوة... قاللي وهو بيضحك هو الشجر بتاعكو غير الشجر بتاعنا ولا ايه؟ وشاورلي على رسمة الشجر اللي في الشاسيه بتاعه>>الشجر الطبيعي اللي احنا نعرفه يعني.
وفي آخر يوم في امتحاناتهم رحت اتطمن على مروة اختي واشوف اللي معاها عملو ايه...
لقيتهم بيسبوا ويلعنو ومتدايقين جدا من امتحان الاحتمالات والاحصا اللي حاطه د/ اسامة حسين اللي كان بيدينا رياضة السنة اللي فاتت
حبيت اخفف عنهم وقلتلهم ان امتحان الاحصا بتاعنا كان بره المنهج... قالولي: احنا كان جوه المنهج بس جووووووه اوووووي!!
,،,،,،,،,،,،,،,،,،,،,،,،,،,،,،,،,،,،,،,،,،,،,،,،,،
بس بجد قضيت اسبوع راائع في القسم ده واقدر اشبهه بخلية النحل ... الكل بيشتغل ..الكل بيساعد بعض... متعاونين لاقصى درجة
ومظلومين والله بوصف ان قسم عمارة قسم الروقان واللي يدخله يبقى دماااااااااغ
بس مفيش قسم بيفضل شغال في الكلية لحد الساعة 7 بلليل الا هما...وزيادة عليهم موصلاتي ساعتين يعني بشّرف البلد الساعة 9 وابدأ يومي الساعة 9 ونص وينتهي الساعة 12 .... يا بلاش
غير ان الشاسيهات ممنوع تطلع بره الكلية ... يعني لما تكون في البيت وشغلك في الكلية وانت مش قادر تعمل حاجة وفاضي طول اليوم تبقى حاجة تقهر ولا لأ؟
زيادة على كده الأخبار اللي بيسمعوها من الدفعات الاكبر منهم ان فلانة جالها انزلاق غضروفي-من التنية ع الشاسيه- ، وفلان اللي شغله ما عجبش الدكتور فقطعله الشاسيه اللي شغال فيه اسبوع كامل، وغيرها ...

ربنا يكون في عون الجميع....
انا شاء الله في الترم التاني احكيلكم مغامراتي في الكلية وتبييض الشاسيهات وانصحكو تيجو تقضو يوم ما يتنسيش معاهم واللي عايز.. يقوللي بس وانا اظبّطه هناك بس ابقو قولو انتو بس...

سلاموز :)


 

الثلاثاء، 3 فبراير 2009

كلمات بحبها اوي

0 التعليقات مرسلة بواسطة Lamees في 5:12 م

لما جبت امتياز في مادة اللغة الانجليزية -اللي هي احسن مادة درستها في الكويت- كرمتني مدرستي اللي بحبها جدا وعطتني كارت مكتوب عليه اهداء جميل جدا جدا...
وانا دلوقتي احب اهديه لكل اللي بحبهم- خصوصا ((فدوى))- ...

Ten Things To Always Remember... and One Thing To Never Forget

Your presence is a present to the world,
You're truly one of a kind,
Your life can be what you want it to be,
Take the days one at a time,
Count your blessings, not your troubles,
You'll make it through whatever comes along,
Within you are so many answers,
Have courage,
Be strong,
Wish upon the star,

and don't ever forget... How very special you are

 

فينكو يا حاسباااااات

0 التعليقات مرسلة بواسطة Lamees في 4:22 م

ايه يا جماعة انا قاعدة بكتب وارد على نفسي كده
انا كنت حابة ان اللي يشاركني هما طلبة حاسبات اللي معايا

يخرب بيت الفراغ!!!

مفيش مشاركة ولا ردود... اسيب المدونة احسن وأصيع!!!
انتو المسؤولين لو حصلي احباط واتخذت نفس منهاج fosdo2a!!!
>>بهزر طبعا


اديني قاعدة مستنية... :(

 

ليه؟

2 التعليقات مرسلة بواسطة Lamees في 4:09 م



ليه؟


ليه لما نمشي فى المطر نرفع أكتافنا لفوق؟


ليه لما نحس إنا دخلنا طريق غلط بالسيارة بنوطي صوت الكاسيت؟


ليه لما تكون بطارية الريموت ضعيفة، بندوس جامد ع الزراير؟


ليه لما تمسك قلم جديد، أول حاجة بنكتب اسمنا للتجربة؟


ليه نقول هدية مجانية؟ مش المفروض إن الهدية مجانية دايما!


ليه لما واحد يقولناحاسب الحيطة مدهونة جديد، نمد صوابعنا نتأكد؟


ليه الخدمة تكون أسرع لما المطعم يكون زحمة؟


ليه لما الواحد يركن السيارة في موقف فاضي اللي جاي وراه بيركن جنبه؟


ليه بنفكر إنه لما ندوس على زراير الأسانسير(المصعد) كتير هييجي بسرعة؟


ليه وإحنا بنأكل الطفل الصغير بالمعلقة. بنفتح بؤنا معاه؟


ليه دايما بنصدق أي حد بيوشوشنا؟


ليه النمرة الغلط دايما ما بتكونش مشغولة لما نتصل؟


ليه لما بنصحى من النوم دايما بنحس إن كمية النوم ناقصها عشر دقايق؟


بتحصل معاكو ولا ايه؟

 

احاسيس

0 التعليقات مرسلة بواسطة Lamees في 3:21 م

اكتر احساس بيخنقني في الدنيا هو الاحساس بالوحدة
واكتر احساس بيدمرني هو الاحساس بالظلم
الله بقى لو الاحساسين دول حسيت بيهم مرة واحدة
ياااااااااااااااااااه
ما انصحش حد يقرب مني عشان ما تحصلش جريمة...

.... بجد ... انا مابحبش أظهر اني مدايقة قدام حد... بس لو حصل وفاض بيا الكتمان....بطلع غيظي كله في اللي حواليا
أصل هما بيقولو ان انا قلبتي وحشة... وبمنتهى الأمانة فعلا انا لما بقلب على حد .... ربنا يستر عليه
كفاية نظرة مني ليه تكرهه في نفسه وفي عيشته

اللي عايز يشوف الحالة اللي انا مش قادرة اوصفها دي، يشوفني في الكلية لما اشوف المعيد اللي كان بيديني logic وربنا يستر هيديني ايه الترم التاني!!!
بجد انا وهو بنتبادل مشاعر الكره ... اصله بيبان من المعاملة :)
وبيحترمني احترام الراجل ده :(
يلا ربنا يبعده عني وما يدينيش في الترم التاني ... ده انا احتمال اغير الجروب بسببه...:)

يلا كفاية كده لحسن انا ادايقت من السيرة
كفاية لحسن اقلب عليكو:)
سلاموز...

 

قصة وعبرة

0 التعليقات مرسلة بواسطة Lamees في 2:02 ص

القصــــــــــــة:
كان هناك تاجر غني له أربع زوجات وكان يحب الزوجة الرابعة أكبر

فيلبسها أفخم الثياب ويعاملها بمنتهى الرقة ويعتني بها عناية كبيرة

ولا يقدم لها إلا الأحسن في كل شيء

وكان يحب الزوجة الثالثة جدا أيضا

وكان فخورا بهما ويحب أن يتباها بهما أمام أصدقائه

وكان يحب أن يراهما ولكنه كان يخشى أن تتركه وتذهب مع رجل آخر

وكان يحب الزوجة الثانية أيضا

فقد كانت شخصية محترمة

دائما صبورة

في الحقيقة كانت محل ثقة التاجر

عندما كان يواجه مشاكل كان يلجأ إليها دائما

وكانت هي تساعده دائما على عبور المشكلة والأوقات العصيبة

أماالزوجة الأولى

فمع أنها كانت شريكا شديد الاخلاص له

وكان لها دور كبير في المحافضة على ثروته وعلى أعماله

علاوة على اهتمامها بالشؤون المنزلية

فمع ذلك لم يكن التاجر يحبها كثيرا

ومع أنها كانت تحبه بعمق إلا أنه لم يكن يلاحظها أويهتم بها

وفي أحد الأيام مرض التاجر

ولم يمضي وقت طويل حتى أدرك أنه سيموت سريعا

فكر التاجر في حياته المترفة

وقال لنفسه:

الآن أنا لي أربع زوجات معي ولكن عند موتي سأكون وحيدا

ووحدتي كم ستكون شديدة

وهكذا سأل زوجته الرابعة وقال لها:

أنا أحببتك أكثر منهن جميعا وههبتك أجمل الثياب وغمرتك بعناية فائقة والآن أنا سأموت

فهل تتبعيني وتنقذيني من الوحدة؟؟

أجابت الزوجة: مستحيل,غير ممكن ولافائدة من المحاولة

ومشت بعيدا عنه دون أي كلمة أخرى

قطعت إجابتها قلب التاجر المسكين بسكين حادة

فسأل التاجر الحزين زوجته الثالثة وقال لها:

أنا أحببتك كثيرا طول حياتي والآن أنا في طريقي للموت

فهل تتبعيني وتحافظين على مصاحبتي؟؟

"لا" هكذا أجابت الزوجة الثالثة ثم أردفت قائلة:

الحياة هنا حلوة,سأتزوج آخر بدل منك عند موتك

غاص قلب التاجر عند سماعه الإجابة وكاد يجمد من البرودة التي سرت في أوصاله

ثم سأل الزوجة الثانية:

أنا محتاج إليك من أجل المعونة وأنت أعنتني وساعدتني دائما والآن أنا أحتاج إلى معونتك مرة أخرى

فهل تتبعيني عندما أموت وتحافظين علي؟؟

فأجابته قائلة:

أنا آسفة,هذه المرة لم أقدر أن أساعدك

هكذا كانت إجابة الزوجة الثانية ثم أردفت قائلة:

(إن أقصى ما أستطيع أن أقدمه لك هو أن أشيعك حتى القبر)

وانقضت عليه إجابتها كالصاعقة حتى أنها عصفت به تماما,,,

عندئذ جاءه صوت قائلا له :

(أنا سأتبعك ياحبيبي وسأغادر الأرض معك وبغض النظر عن أين ستذهب وسأكون معك إلى الأبد)

نظر الزوج حوله يبحث عن مصدر الصوت وإذا به زوجته الأولى التي كانت قد نحلت تماما

كما لو كانت تعاني من المجاعة وسوء التغذية

وقال التاجر وهو ممتلئ بالحزن واللوعة:

كان علي أن أعتني بك أفضل مما فعلت حينما كنت أستطيع,,,


انتهت القصة
ولكــــــــــــــــــــــن هنا العبــــــــــرة:

كلنا لنا أربع زوجات:

الزوجة الرابعة:
هي أجسادنا التي معها سرقنا الوقت والجهد والمال عن الإهتمام بها وجعل مظهرها جميلا
فإنها عند موتنا ستتركنا.

الزوجة الثالثة:
هي ممتلكاتنا وأموالنا ومنزلتنا التي عند موتنا نتركها فتذهب للآخرين

الزوجة الثانية:
هي عائلاتنا وأصدقاؤنا مهما كانوا قريبين جدا منا ونحن أحياء
فإن أقصى مايستطيعونه هو أن يرافقونا حتى القبر

أماالزوجة الأولى:
فهي في الحقيقة حياتنا الروحية وعلاقتنا مع الله
التي غالبا نهملها ونحن نهتم ونسعى وراء الماديات والثروة والأمور الأخرى
ولكنها في الحقيقة الوحيدة التي تتبعنا حيثما ذهبنا


 

هل انت مريض نفسي؟؟!!

2 التعليقات مرسلة بواسطة Lamees في 1:55 ص


إذا جاوبت خطأعلى هذا السؤال يعني أنك انسان طبيعي مش محتاج طبيب نفسي !!
________________________________________

قصة بنت وفيها سؤال ..

بنت ماتت أمها وفي أثناء تشييع جنازة الأم قابلت البنت شاب أول مره تشوفه

وكان وسيم جدا ووجدت فيه جميع المواصفات اللي كانت تتمناها في فارس أحلامها .

أعجبت هده الفتاة بذلك الشاب وحبته حب شديد لكن المشكلة إن هذه الفتاة لم تتعرف عليه و

لم تأخذ عنوانه أو رقم تليفونه

و حتى اسمه ما عرفتهوش..!

بدأت البنت تبحث عن أي شيء أو معلومات تدلها عليه.........

لكن جميع محاولاتها باءت بالفشل .

وبعد أيام قليله قتلت هذه البنت أختها.؟؟؟؟؟؟ !!!!!

السؤال.......... في اعتقادك :

ماهو السبب الذي جعل الفتاة تقدم على قتل أختها ؟
فكر كويس قبل ما تشوف الإجابة... وحاول إنك تكون صادق مع نفسك عشان تعرف انت محتاج

طبيب نفسي أو لأ ..





ها ؟ فكرتوا كويس..؟؟





الجواب :


قامت الفتاة بقتل أختها على أمل أن يظهر ذلك الشاب مرة أخرى في جنازة أختها !





إذا جاوبت نفس الإجابة فهدا يدل على إن تفكيرك مثل تفكير المرضى النفسيين اللي عندهم ميول ونزعه للقتل.

هذا الاختبار طبق من قبل أطباء نفسيين على أشخاص كان المراد معرفة هل تفكير هؤلاء الأشخاص تفكير إجرامي أم لا .

وطبق هدا الاختبار على مجرمين عده كانوا متهمين بارتكاب مجموعة من الجرائم وقد أجابوا عليه بشكل صحيح

 

أواخــر الـشـتــا

0 التعليقات مرسلة بواسطة Lamees في 1:50 ص

من قصيدة (أواخــر الـشـتــا)

للشاعرة/ إليسا أبو ماضى

كنا فى أواخر الشتا قبل اللى فات

زى اليومين دول عشنا مع بعض حكايات

أنا كنت لما أحب أتونس معاه

أنا كنت باخد بعضى واروح له من سكات

أجب عن الأسئلة التالية:
1- علام يدل التعبير بصيغة الماضى؟ ولماذا اختصت الشاعرة الشتا قبل اللى فات؟
2- فى أى فصل من فصول السنة كتبت هذه القصيدة؟ (مستدلا على ما تقول)
3- علام يدل التعبير (أنا كنت باخد بعضى وأروح له من سكات)؟
4- أيهما أفضل (أنا كنت باخد بعضى) أم (أنا كنت باخد تاكسى)؟ ولماذا؟
5- اختر الإجابة الصحيحة مما بين القوسين:
- الجمال فى قولها (عشنا - معاه): (تصريع - جناس - حسن التفات)
- (أروح له من سكات) المقصود بها: (دكاكينى - دحاليبى - ذرابيئى)
- مصدر كلمة (أتونس): (تَوَنًّس - تُونِس - تَنَاسَى)
- (زى اليومين) مجاز مرسل علاقته: (الكلية - المدرسة - الحضانة)


*****

والناس فى عز البرد يجرو ويستخبو

وأنا كنت باجرى وأخبى نفسى قوام فى قلبه

ولحد لما الليل يليل بابقى جنبه

وأفضل فى عز البرد وياه بالساعات

أجب عن الأسئلة التالية:
1- هات من الأبيات مضاد (النهار), وكلمة تؤدى معنى (معاه)
2- يرى بعض النقاد أن تكرار (فى عز البرد) أضعف المعنى. وضح ذلك مبينًا رأيك.
3- إلى أى مدرسة شعرية تنتمى الشاعرة؟ وما أهم سماتها؟ (بدون غلط)
4- هل ترى أن هناك علاقة بين (عز البرد) و (عز الدخيلة)؟ أم أنها تشابه أسماء؟!
5- أيهما أفضل (ولحد) أم (ولغاية)؟ ولماذا؟


*****

على سهوة ليه الدنيا بعد ماعشمتنا

وعيشتنا شوية رجعت موتتنا

والدنيا من يوميها ياقلبى عودتنا

لما بتدى حاجات قوام تاخد حاجات

أجب عن الأسئلة التالية:
1- اختر الإجابة الصحيحة مما بين الأقواس:
- (على سهوة) تفيد: (السرعة - العجلة - الموتوسيكل 'البجاج الهندى أبو 7')
- (عيشتنا - موتتنا) تفيد: (التضاد - التأكيد - الحيرة فى اتخاذ القرار فى السقعة)
- كلمة تؤدى معنى (شوية): (بعضشى - حفان - قيمة مقطف)
- المقصود بـ (يوميها) فى الأبيات: (يوم العاركة - يوم الخناقة - يوم الكرامة)
2- اشرح الأبيات شرحًا مفصلا باختصار.
3- أيهما أفضل (ياقلبى) أم (يانضرى)؟ ولماذا؟
4- يتضح فى الأبيات أن (الدنيا ملهاش أمان .. خالص). وضح ذلك مستدلا على ما تقول.
5- ا ستخرج من الأبيات مايدل على:
- عشمنى بالمحبة وشعلقنى بالهوا، حايلته حبة حبة زودها واتلوى.
- زألطنى الحب زألوط، نمت فى بنها صحيت فى أسيوط.


*****

وسط الشوارع ناس كتيرة مروحين

والناس ياقلبى هما هما وهو فين

وأنا ماشية باتلفت وباسأل كل يوم

بيعمل إيه دلوقتى وبيحلم بمين

أجب عن الأسئلة التالية:
1- يتضح فى الأبيات الشوق اللهفة وتطلع الشاعرة لرؤية (اسم النبى حارسه). اشرح
2- يؤخذ على الشاعرة (وأنا ماشية باتلفت). وضح ذلك مبينًا مدى التعارض مع قواعد المرور.
3- فى الأبيات لوحة فنية رائعة للناس اللى مروحين والمطرة اللى خلصت وبعد ما الخناقة انفضت قام شريف الظالم
أفكار يا أفكار فين راحت أفكار؟! رد ابنه عليه ومنين ارتاحت أفكار ما انت السبب السبب يابا فرقت بين حبيبين
آه يابا آه يابا على قلبك فرقت بين حبيبين أفكار كانت راحة ابنك وابنك كانت راحة أفكار. نسيت كنت عايز أسأل فى إيه.
4- لماذا غضبت أفكار وتركت البيت؟ ولمَ كثر عتاب الابن لأبيه؟
5- ((حُذف من قِبَل الرقابة))


مع الاعتذار لمحبي الفنانة إلـــــــيسا : )

 

مشكلة

0 التعليقات مرسلة بواسطة Lamees في 1:49 ص

كان الرجل قد أوشك أن يلقي بنفسه في البحر لولا انه سمع
صوتا يصيح به قائلا أيــها المجنون ....قـــف

وأيقن انه لن يتمكن من الانتحار
بهدوء وتوقف الرجل مرتبك

وشاهد رجلا عجوزا يتقدم منه


وينهال عليه بعبارات التأنـيب ليأسه
من رحمة الله ومحاولته
الانتحار


ثم سأله :
مالذي يدفعك الى الانتحار يا رجل ؟

فقال :
مشكلة عائليه معقدة
فرد عليه العجوز
وهل توجد مشكلة دون حل ما هذه المشكلة ؟

وبدأ الرجل يروي قصته

قائلا :
تزوجت سيده ارمله ولها فتاه مراهقة وعندما بلغت الفتاه
سن الرشد رآها ابي

فاحبها وتزوجها فصرت صهرا لابي كما ان ابي اصبح في مقام
زوج ابنتي

واصبحت انا (حما) لابي لان زوجتي حماته

ثم انجبت زوجتي ولدا لي


فاصبح الولد سلف ) ابي)

وبما ان ابني هو اخو زوجه ابي التي هي بمثابة
خالتي صار ابني يعد خالي
ايضا

وحدث ان وضعت زوجه ابي طفلا يعد اخي من ابي وفي
الوقت نفسه هو حفيدي

لانه حفيد زوجتي من ابنتها وبما ان زوجتي صارت جده
اخي فهي بالتالي
جدتي وانا حفيدها

وهكذا اصبحت انا زوج جدتي وحفيدها في الوقت ذاته

ونظرا الى انها جدة اخي فانا اصبحت ايضا جدا لاخي

وبناء عليه اكتشفت انني اصبحت جد نفسي او حفيد نفسي
لانني ......

وهنا قاطعه الرجل العجوز

قائلا : كفى... كفى...


وقام العجوز بدفعه للبحر قائلاً:

أبوك لأبو جدك لأبو إللي جابك

 

الاثنين، 2 فبراير 2009

قصة الأمس

0 التعليقات مرسلة بواسطة Lamees في 2:29 ص

بداية انا مش بحب الهام شاهين.... بس ما اقدرش اخبي اعجابي بأداءها في مسلسل قصة الأمس
بصراحة قصة المسلسل رائعة وبتحكي واقع بيحصل للمغتربين خصوصا في الكويت >> ربنا يستر

بس كان ليا اعتراض مهم جدا...
المسلسل بيرسخ فكرة ان المغترب ده بيكون مرتبه الشهري آلاف الدنانير زي ما كان واضح في المسلسل ان صاحب الشركة بيتحايل ع المهندس انه يجدد عقده ويكون راتبه 4 الاف دينار وكمان ساكن في فيلا ايجار>> طبعا المهندس ممكن، بس مش كل الناس
وطبعا ماحدش هيفرق بين الوظائف... اهو كله شغل بره وفي دول خليجية

طبعا بما اني انا واهلي عايشين في الكويت فالناس واخدة فكرة ان بابا وماما بيحوشو في المليون التاني مثلا..
لاغيين من اعتبارهم التزاماته في الكويت والتزاماته في مصر ومصاريف كليتي انا واختي....( ربنا يهديهم)...

وبعد المسلسل ما اعتقدش ان فيه حد هيصدق ان مرتب المهندس(ما شاء الله) مش زي مرتب المدرس( يا عيني عليه)

ها.... عايزة اشوف الآراء بقى....

بالمناسبة ... كل الستات بقت خايفة لينزلو مصر ويلاقو ميرفت محصّلاهم....هههه




 

;;
Subscribe to: الرسائل (Atom)